Təhsil müəssisəsinin təhlükəsiz açılmasını təmin  etmək üçün şirkətimiz ziyarətçilərin axını və  temperatur taramasını idarə edən cihazları özündə cəmləyən Həlli təqdim edir.

Azərbaycan Respublikası Nazirlər Kabinetinin “Azərbaycan Respublikasında fəaliyyət göstərən təhsil müəssisələrində 2021/2022-ci tədris ilində tədris və təlim-tərbiyə prosesinin təşkili ilə bağlı bəzi məsələlər haqqında” 10 sentyabr 2021-ci il tarixli 259 nömrəli Qərarına əsasən Azərbaycan Respublikasında fəaliyyət göstərən ali təhsil müəssisələrində 2021/2022-ci tədris ilində tədris və təlim-tərbiyə prosesinin 2021-ci il sentyabrın 29-dan başlanması və əyani formada təşkil edilməsi qərara alınmışdır. Həmin Qərara əsasən təhsil müəssisələrində tədris və təlim-tərbiyə prosesinin Azərbaycan Respublikası Nazirlər Kabinetinin 2020-ci il 10 sentyabr tarixli 332 nömrəli Qərarı ilə təsdiq edilmiş “Xüsusi karantin rejimi dövründə Azərbaycan Respublikasında fəaliyyət göstərən təhsil müəssisələrində tədris və təlim-tərbiyə prosesinin təşkilinin müvəqqəti Qaydaları”nın tələblərinə müvafiq olaraq təşkili təmin edilməlidir.

Universitetdə tələbə və əməkdaşların tədris binalarına girişinin müvafiq tələblərə uyğun təşkili üçün onların smart kartlarını qeydiyyatdan keçirməklə girişlərdə quraşdırılmış turniketlər və üz tanıma sistemi ilə işləyən temperatur ölçən avadanlıqlar vasitəsilə təşkil edilir. Həmin turniketlər smart kart vasitəsilə peyvənd sertifikatının olub-olmaması və termal kamera sistemi ilə işləyən təmassız termometr vasitəsilə hərarətin müəyyən edilərək buraxılışa icazə verilməsi mexanizmi əsasında işləyir. Beləliklə, tələbə və əməkdaşın peyvənd sertifikatı olmadığı və ya bədən hərarəti  yüksək olduğu hallarda həmin şəxsin Universitetə daxil olmasına turniketin açılmaması ilə icazə verilmir. Turniketlər və termal kameralar müvafiq proqram təminatı vasitəsilə Azərbaycan Dövlət İqtisad Universitetində tətbiq olunan EDUMAN Təhsilin idarə edilməsi sistemi ilə əlaqələndirilmişdir. Belə ki, Eduman Məlumat bazası ilə peyvənd sertifikatı bazasının inteqrasiyası, e-jurnal modulunda sertifikatlar haqqında məlumatın əks olunması, tələbələrə onlayn sms-in göndərilməsi proqramı yaradılmışdır. 

Ümumi olaraq UNEC-də prosesin icrası mərhələləri aşağıdakı kimi müəyyən olunmuşdur:

•Bütün professor-müəllim heyəti, təhsilalanlar və əməkdaşlar turniketlərdən keçidə imkan verən smart kartlarla təmin edilir; 

•COVID-19 pasportları və ya immunitet sertifikatlarının mövcudluğu haqqında aidiyyəti dövlət qurumlarından əldə olunan məlumatlar EDUMAN-Tədrisin Elektron İdarəetmə sisteminə inteqrasiya olunur; 

•EDUMAN bazası ilə peyvənd sertifikatı bazasının inteqrasiyasının nəticələri e-jurnal modulunda sertifikatlar haqqında məlumatın əks olunması ilə öz əksini tapır; 

•SMS-lər vasitəsi ilə professor-müəllim heyətinə, təhsilalanlara və əməkdaşlara COVID-19 pasportları və immunitet sertifikatları mövcud olmaması haqqında öncədən məlumat göndərilir